ಆಕೆ ಮತ್ತು ಈಕೆ

ಜನುಮ ಕೊಟ್ಟಳು ಜನನಿ ಆಕೆ
ಒಂಭತ್ತು ತಿಂಗಳು ಜಠರದಲ್ಲಿಟ್ಟು
ರಮಿಸುತಲಿಹಳು ರಮಣಿ ಈಕೆ
ಒಂಭತ್ತು ವರುಷ ಒಲವ ಕೊಟ್ಟು

ದಿನ ರಾತ್ರಿ ಮಲಗಿಸುತ್ತಿದ್ದಳು ಆಕೆ
ಬರುವುದೆಂದು ಹೆದರಿಸಿ ಗುಮ್ಮ
ಕನಸಾಗಿ ಬಂದು ಕಾಡಿದಳು ಈಕೆ
ನಾನಾದೆ ನಿದ್ರೆಗೆಟ್ಟ ಮಂಕುತಿಮ್ಮ

ಕೈಹಿಡಿದು ಹೆಸರ ಬರೆಸಿದಳು ಆಕೆ
ಅವಳೇ ಮೊದಲ ಗುರುವು, ರೈಟು
ಎನ್ಹೆಸರಿಗೆ ತನ್ಹೆಸರ ಸೇರಿಸಿಹಳು ಈಕೆ
ಇವಳ ಹೆಸರೇ ಎನ್ನ ಹಾರ್ಟು ಬೀಟು

ಎಣ್ಣೆ ಹಚ್ಚಿ ತಲೆ ಬಾಚಿದವಳು ಆಕೆ
ಎನ್ನ ಬಾಲ್ಯಕ್ಕೆ ನೆರಳಾದ ಮರ
ಮೀಸೆ ಚುಚ್ಚಿ ತುಸು ನಾಚಿದವಳು ಈಕೆ
ಹರೆಯಕ್ಕೆ ದೇವರು ಕೊಟ್ಟ ವರ

ಅಮ್ಮನೆಂದಾಗ ಮಿಡಿವ ‘ವೀಣೆ’ ಆಕೆ
ಮಮತೆ ಮೈತುಂಬಿಕೊಂಡ ಮದರ್ರು
ಸುಮ್ಮನಿದ್ದರೂ ನುಡಿವ ‘ವಾಣಿ’ ಈಕೆ
ಇಬ್ರೂ ಮೇಡ್ ಫಾರ್ ಈಚ್ ಅದರ್ರು

ಈಕೆ ಆಕೆಗೆ ಸೊಸೆಯಾದಾಗ, ಅತ್ತೆ ಈಕೆಗೆ ಆಕೆ
ಸಧ್ಯಕ್ಕಿಬ್ಬರಿಗೂ ಕಾಡುತ್ತಿರುವುದು ಒಂದೆ ಚಿಂತೆ
ನಾ ದಪ್ಪಗಾಗ್ತಿಲ್ಲವಲ್ಲ ಯಾಕೆ? ಯಾಕೆ? ಯಾಕೆ?

- ತ್ರಿವಿಕ್ರಮ